Lokarri

 

Lokarrik, akordioaren eta kontsultaren aldeko herritarren Sareak, eskatzen du aske uztea gaur gauean Juan Garzon epaileak D3M plataformaren bederatzi bultzatzaileren aurka agindutako operazioan atxilotutakoak. Hiru arrazoik justifikatzen dute eskaera hau: zein unetan gauzatu diren atxiloketak, erabilitako forma eta horrek dakarren askatasun demokratikoen urraketa.

Unea

Haustekundeen aurrekanpainan bete-betean sartuak garelarik eta bere hautagai-zerrendak aurkeztu ahal izateko D3M sinadurak biltzen ari zelarik agindu dira atxiloketa hauek. Ekintza honek erakusten du epailearen jokaera oso larria izan dela, arrazoirik eta neurririk gabeko desitxuratzea eragin baitu justu proiektu politikoak eta herritarrak protagonistak diren eta hitza eta erabakia beren esku dituzten unean.

Forma

Aurreko zenbait ekintza errepikatuz, gauez agindu du Garzon epaileak operazio hau eta atxilotuei jakinarazi gabe zabalik zela euren kontrako auzi bat. Halakoetan atxiloketa prebentiboa ez dago justifikatua. Ezin da alegatu ihes egiteko balizko arriskua D3Mren hautagai-zerrenda sustatzen duten pertsonek hauteskundeetan parte hartu nahi dute eta.

Eskubideak eta oinarrizko Askatasun demokratikoak urratu dira

Operazio hau nola gauzatu den kontuan hartuta, atxilotutako pertsonek ez dute defentsa era azkar eta eraginkor batean egiteko aukerarik izango Garzon epaileak leporatutakoen harira. Atxilotutako pertsonek ezin izango diete kontra egin leporatzen dizkieten akusazioei hauteskundeetara denboraz aurkezteko. Ekintzen bidez izan da legez kanporatua D3M, lege-bidezidor bat baliatuz, Alderdien Legean jasotzen den prozedura eragozteko.

Gure gizartearen zati handi bat ordezkatzen duen hautu politiko batek ezin izango du eduki dagokion ordezkaritza datorren Eusko Legebiltzarrean. Hauteskunde batzuetan hautatua izan ahal izateko, ideia politikoak publikoki defenditu ahal izateko eta alderdi politikoetan zein hauteskundeetarako plataformetan bildu ahal izateko aukera oinarrizkoa da Zuzenbide Estatu orotan eta erabat bermatuta egon behar du. Sistema demokratiko batek ezin du asmo izan bere herritarren sektore oso bat  hauteskundeetan adierazteko eskubiderik gabe uztea.

NBEren Giza Eskubideen Batzordeak jada ohartarazi du egoera honetaz

Aipatu gaiaren inguruan Espainiari buruz aurkezturiko txostena dela-eta Giza Eskubideen Batzordeak argitaraturiko azterlan batean, jada ohartarazten da terrorismoaren defenizioen gehiegizko erabileraz:

“Batzordeak bere kezka agertzen du barne zuzenbidean terrorismoaren definizioak potentzialki zenbateraino ari diren hedatzen, zehazki Kode Penal espainiarraren  572tik 580ra bitarteko definizioak, izan ere Hitzarmenean jasotako hainbat eskubide urratzea ekar bailezake.

Estatu parteak  terrorimoa era murriztailean definitu behar du eta terrorismoaren aurkako bere neurriak erabat bateragarri egin behar ditu Hitzarmenarekin. Zehazki, el Estatu parteak Kode Penalaren 572tik 580ra bitarteko artikuluak aldatzea aurreikusi beharko luke mugatzeko zalantzarik gabe izaera terrorista duten eta, hortaz, dagokien tratamendua merezi duten arau-hausteak.”

Lokarriren iritzian, erakunde armatu bateko partaidetza delituaren aplikazioa hedatu eta hauteskundeetarako hautagai-zerrenda bat sustatzeko ahalegina egiten duten pertsoenei leporatzeak nabarmenki bortxatzen ditu Giza Eskubideen Deklarazioa eta Eskubide Sozial eta Politikoen Nazioarteko Hitzarmena, Espainiak sinatuak biak.