Lokarri

Bake-prozesuaren begiraleak behar ditu Lokarrik

2009-05-26 Bake-prozesuaren Behatoki Soziala jarri du abian herritarren Sareak
Herri-partaidetza aktibo baten esperientzia da Behatokia
 
Bake-prozesuaren Behatoki Soziala jarri du abian Lokarrik. Herritarrek bakeari eta bizikidetzari buruz zer iritzi duten jakitea eta aurrerapauso garrantzitsuak ematen laguntzkeo ideia eta proposamen berriak aurkeztea da Bake-prozesuaren Behatoki Sozialaren helburua.
 
Bakearen, sufrimenduaren amaieraren, elkarrizketaren eta akordioaren alde lan egiteko prest dauden pertsonek beren ekarpenak egiteko baliabide bat izan nahi du Behatoki Sozialak. Euskal gizarteak pairatzen dituen arazoak gainditzeko beharrezkoak dira herritarren inplikazioa eta partaidetza, eta herritarren kezkak adierazteko toki bat eskaini nahi du Behatoki Sozialak.

Bere izaera soziala da mota bereko ekimenekin alderatuta Behatoki honek dakarren berritasuna. Parte-hartzeko prest dauden pertsona guztiak izango dira protagonista, gaiaren inguruan bildutako aditu talde bat izan beharrean. Bakearen eta elkar-ulertzearen alde aurrera egiteko estrategietan eta proposamenetan zuzenean eragitea helburu duten iritziak adierazteko modu bat eskainiko du partaidetza esparru honek.

Parte-hartzeko prest dauden pertsona guztiei hiru hilean behin Lokarrik bidaliko dien galdetegi bat izango da Behatoki Sozialaren euskarri nagusia. Hiru zati edukiko ditu galdetegiak: 1) galdetegi guztietan errepikatuko diren galdera batzuk, gizartearen bakea ulertzeko moduaren garapena ezagutzeko baliagarriak, 2) beste galdera batzuk jazotako gertaera garrantzitsuei buruz eta 3) azken galdera batzuk gai zehatzago baten gainean. Galdetegi batetik bestera aldatu egingo da gaia. Lehendabiziko galdetegiak berradiskidetzea du aztergai.

Jasotako erantzun guztiak Lokarrik prestaturiko txosten batean bilduko dira. Erakundeei, alderdi politikoei eta beste eragile sozial batzuei bidaliko zaie txostena. Edukian egongo da txostenen garrantzia, izan ere, pertsona parte-hartzaile guztiek bidalitako ekarpenen batuketaren emaitza izango baita edukia.

 

Lehendabiziko galdetegia

 

Bi zati desberdin ditu Behatokiak aurkezturiko lehendabiziko galdetegiak:

1- Lehendabizikoan, galdera-sorta bat aurkezten da jakiteko herritarrek nola ulertzen duten bake eta normalizazio politikoaren aldeko prozesuaren garapena, eta bi arlo horietan aurrerapausoak emateko proposamen zehatzak eskatzen dira. Gainera, galdetu egiten da erakundeek, alderdi politikoek eta Lokarrik bake helburuei egindako ekarpenaren eta ETAren ekintzaren balorazioaz. Gaurkotasuneko gaiei buruzkoak dira azken galderak, hala nola, presoen senideentzako laguntzei buruzkoak edo Konpondu ekimenari buruzkoak.


2- Biktimak eta berradikidetzea dira bigarren zatiaren gai ardatz. Batetik, indarkeriaren biktimei ematen zaien tratamenduaz eta definizioaz galdetu nahi da, bai eta Giza Eskubideen urraketak pairatzen dituzten beste sektore batzuei buruz ere. Bestetik, jakin nahi da zer ulertzen duen gizarteak berradiskidetze kontzeptuaz.

 

Partaidetza bake-prozesuaren begirale jardunez

 

Partaidetza zabala edukitzeak xedatuko du Behatoki Sozialak eskaintzen dituen proposamenen eta balorazioen kalitatea. Beren iritzia eman nahi duten pertsona guztiek internet bidez edo galdetegiaren kopia bat paperean eskatuz egin dezakete:

  • Lokarriren web orrian dago eskuragarri Behatokiaren lehendabiziko galdetegia zuzenean erantzuna izateko.
  • Internet ez dutenek edo nahiago dutenek paperean erantzutea, Lokarrirekin jar daitezke harremanetan 902 42 10 10 telefonoan kopia baten bidalketa eskatzeko.

Galdetegia erantzuten duten pertsona guztiek ondorio eta proposamenen txostenaren kopia bat jasoko dute. Gainera, bere web orrian eta arestian adierazitako telefono zenbakian bake-prozesuaren begirale jarduteko izena emateko aukera eskaintzen du Lokarrik. Izena emandako pertsonek hiru hilean behin jasoko dute galdetegia beren iritziak agertzeko galdetegi bakoitzean proposatzen diren gaiei buruz.

 

Tokian tokiko Behatoki Sozialak

 

Bake-prozesuaren Tokiko Behatokiak ere ari da eratzen Lokarri EAEko eta Nafarroako herri ezberdinetan. Partaidetza esparruak dira Tokiko Behatokiak eta interesaturik dauden pertsona guztiei aukera ematen diete galdetegi bakoitzean proposatzen diren gaiei buruz eztabaidatu eta elkarri entzuteko. Eztabaida eta entzumen ariketa lantzeko talde horietako batean parte-hartu nahi duten pertsonek info@lokarri.org helbidera mezu bat bidali edo 902 42 10 10 telefonora deitu baino ez dute.

 


1. eranskina
Bake-prozesuaren Behatoki Sozialaren materialak eta baliabideak:


1- Argibide-eskupapera

2- Galdetegia web orrian eta pdf-an:

3- Begiraleek izena emateko formularioa:

4- Promozio bideoak:1 eta 2

5- Behatoki Soziala herri sareetan: Facebook (Lokarri Red) eta Twitter

 

Zure iritzia bidali